ပြည်ထောင်စု ရွေးကောက်ပွဲ ကော်မရှင်သည် နိုဝင်ဘာလ ၇ ရက်နေ့တွင် ကျင်းပမည့် ရွေးကောက်ပွဲတွင် ၀င်ရောက်ယှဉ်ပြိုင် ရန် နိုင်ငံရေးပါတီ ၃၇ ပါတီကို ခွင့်ပြုခဲ့ပြီး ထိုပါတီများ၏ စာရင်းကို ကြေညာချက်အမှတ် (၉၇/၂၀၁၀) ဖြင့် စက်တင်ဘာလ ၁၄ ရက် နေ့တွင် ထုတ်ပြန်ခဲ့သည်။ ထိုနေ့မှာပင် ရွေးကောက်ပွဲကော်မရှင်သည် တနိုင်ငံလုံးရှိ သက်ဆိုင်ရာရုံးခွဲများတွင် နိုင်ငံရေး ပါတီများမှ ၀င်ရောက်ယှဉ်ပြိုင်မည့် ကိုယ်စားလှယ်လောင်း စာရင်းများကို ကြေညာထားသည်။
အစပထမတွင် ရွေးကောက်ပွဲ ကော်မရှင်သို့ နိုင်ငံရေးပါတီအဖြစ် မှတ်ပုံတင်ခဲ့သော ပါတီပေါင်း ၄၇ ပါတီရှိသည်။ ၎င်းတို့ အထဲ မှ ၄၂ ပါတီကို ကော်မရှင်က မှတ်ပုံတင်ခွင့်ပြုခဲ့သည်။ နိုင်ငံရေးပါတီများ မှတ်ပုံတင်ခြင်းဥပဒေအရ နိုင်ငံရေးပါတီတခုသည် ရွေးကောက်ပွဲတွင် ကိုယ်စားလှယ်လောင်း အနည်းဆုံး ၃ ဦး ၀င်ပြိုင်ရန် လိုအပ်ပါသည်။ သို့မဟုတ်ပါက ပါတီ ဖျက်သိမ်းခံရ မည် ဖြစ်သည်။ သို့ရာတွင် မြန်မာ့လူ့ဘောင်သစ် ဒီမိုကရက်တစ်ပါတီ၊ ပြည်ထောင်စု ကရင်အမျိုးသားများ အဖွဲ့ချုပ်၊ မြန်မာ ဒီမိုကရေစီ ကွန်ဂရက်၊ မြို တိုင်းရင်းသားပါတီ နှင့် ဒေသဖွံ့ဖြိုးတိုးတက်ရေးပါတီ (ပြည်) တို့သည် ကိုယ်စားလှယ်လောင်း ၃ ဦး မပြိုင်နိုင်သည့်အတွက် ကော်မရှင်က ပါတီအဖြစ်မှ ဖျက်သိမ်းခဲ့သည်။
အောက်ဖော်ပြပါတို့မှာ လာမည့်ရွေးကောက်ပွဲတွင် ၀င်ရောက်ယှဉ်ပြိုင်မည့် နိုင်ငံရေးပါတီ ၃၇ ပါတီစာရင်းဖြစ်ပါသည်။ ဧရာ ၀တီက အဓိကပါတီ တချို့၏အချက်အလက်များကို ဖော်ပြထားပြီး ကျန်ရှိနေသေးသောပါတီများ၏ အချက်အလက်များကို လည်း ဆက်လက်ဖော်ပြသွားပါမည်။
